काठमाडौं । महोत्तरीको जिल्ला अस्पताल जलेश्वरमा अहिले भाइरल ज्वरोका बिरामीको सङ्ख्यामा वृद्धि भएको छ । अस्पतालका मेडिकल सुपरिटेण्डेण्ट एवं निमित्त कार्यालय प्रमुख डा.सतिश साहकाअनुसार एक हप्तादेखि जिल्ला अस्पतालमा भाइरल ज्वरोका बिरामीको चाप ह्वात्तै बढेको हो ।
उनले अहिले जिल्ला अस्पतालमा उपचार गराउन आएका बिरामीमध्ये ६०÷७० प्रतिशत बिरामी भाइरल ज्वरोका नै हुने गरेको बताए । उनकाअनुसार अहिले अस्पतालमा दैनिक औसतमा ५० जना भाइरल ज्वरोका बिरामी उपचारका लागि आउने गरेका छन् ।
केही दिनदेखि तराई मधेशमा अत्यधिक गर्मी बढेको र समय–समयमा वर्षा पनि भइरहेका कारण वातावरणमा आएको परिवर्तनले मानिसमा भाइरल ज्वरोको प्रकोप देखिएको डा.साह बताउँछन् । यस्तो अवस्थामा मानिसलाई नआत्तिन, झोल पदार्थ बढी खान, पानी बढी पिउन, खानपिन र सरसफाइलगायतका जनस्वास्थ्यको मापदण्डमा ध्यान दिन डा.साहले सबैलाई आग्रह गरेका छन् ।
Copyright © All right reserved to webtvkhabar.com Site By: Sobij
