वेबटिभी खबर
मोरङ । मोरङको कटहरी गाउँपालिकामा सूचीकृत एक हजार ३९ जना बेरोजगारलाई रोजगार उपलब्ध गराइने भएको छ ।
कटहरी गाउँपालिका, नेपाल उद्योग वाणिज्य महासंघ र हेल्भेटासद्वारा संयुक्तरूपमा कटहरी-१ स्थित फलफूल तथा कृषि थोक बजारमा मंसिर १२ गते आयोजना हुने एकदिने ‘रोजगार मेला’मार्फत् रोजगार लगाइने भएको हो ।
गाउँपालिकाका अध्यक्ष देवराज चौधरीले आज आयोजित पत्रकार सम्मेलनमा वैदेशिक रोजगारबाट फर्किएका, स्वदेशमा कामको खाजीमा रहेका तथा प्राविधिक एवम् उच्च शिक्षा अध्ययन गरी बसेको युवाहरूलाई रोजगार उपलब्ध गराउन मेलाको आयोजना गरिएको बताए ।
उद्योगलाई आवश्यक पर्ने जनशक्तिलाई चाहिने सीप एवम् तालिमसमेत पालिकाले उपलब्ध गराउने उनले जानकारी दिए । स्वदेशी दक्ष जनशक्तिलाई स्थानीय उद्योगमा व्यवस्थापन गर्नु मेलाको मुख्य उद्देश्य छ ।
महासंघमा आबद्ध मोरङ, सुनसरी र झापाका १५ उद्योगीहरूले आवश्यक जनशक्तिका सम्बन्धमा १० वटा स्टलमार्फत् जानकारी गराउनेछन् । मेलामा तीन हजार युवाहरूको सहभागिता रहने विश्वास गरिएको छ । पालिकामा हाल ठूला र मध्यमस्तरका ६५ उद्योग दर्ता रहेका छन् ।
Copyright © All right reserved to webtvkhabar.com Site By: Sobij
