एजेन्सी– विश्व विजेता फ्रान्स फिफा विश्वकप कतार २०२२ को युरोपियन छनोटमा युक्रेनसँग बराबरीमा रोकिएको छ। यसअघि बोस्निया एन्ड हर्ज गोभिनासँग बराबरी खेलेको फ्रान्सले युक्रेनसँग १–१ गोलको बराबरी खेलेको हो ।
एनएसके ओलिम्पी किएभमा शनिबार राति भएको प्रतिस्पर्धात्मक खेलमा घरेलु टोली युक्रेनले खेलको ४४औं मिनेटमा अग्रता लिएको थियो ।
दोस्रो हाफको शुरुमै फ्रान्सले बराबरी गोल फर्कायो । एन्थोनी मार्सियालले एड्रिएन राविओटको पासमा गोल गर्न सफल भएका थिए । त्यसपछि थप गोल निस्कन नसक्दा खेल १–१ गोलकै बराबरीमा टुंगियो ।
पछिल्लो पाँच खेलमा फ्रान्सको यो पाँचौ बराबरी हो । गत जुलाईमा सम्पन्न युरो कपमा समूह चरणको खेलमा जर्मनीलाई १–० ले हराएयता फ्रान्सले पाँच खेल खेल्दा जित निकाल्न सकेको छैन । विश्वकप छनोटमा फ्रान्सको यो तेस्रो बरारबरी हो । यसअघि फ्रान्सले युक्रेनसँगै १–१ गोलको बराबरी खेल्दा बोस्नियासँग पनि १–१ गोलकै बराबरीमा रोकिएको थियो ।
यो नतिजापछि समूह ‘डी’ मा फ्रान्स ५ खेलबाट ९ अंक जोडेर शीर्षस्थानमा रहँदा युक्रेन ५ अंक जोडेर तेस्रो स्थानमा रहेको छ । समान ५ अंक भएपनि फिनल्यान्ड गोल अन्तरमा दोस्रो स्थानमा रहेको छ । बोस्निया एन्ड हर्जगोभिना र काजकस्तान समान २ अंक जोडेर चौथो र पाँचौ स्थानमा रहेको छ ।
Copyright © All right reserved to webtvkhabar.com Site By: Sobij